shamsiswanam - read@ur own risk :)

Pages

Showing posts with label kerala. Show all posts
Showing posts with label kerala. Show all posts

Sunday, 1 July 2012

കൊന്നവര്‍ പാവങ്ങളാണ്

http://shamsiswanam.com
ചോരയും വിപ്ലവവുമൊക്കെ പറയുമെങ്കിലും സി. പി. എമ്മുകാര്‍ പാവങ്ങളാണ്. വായില്‍ വിരലിട്ടാല്‍ പോലും ഐസ് മിഠായിയാണെന്നു കരുതി ഈമ്പിക്കളിക്കുന്ന കൂട്ടര്‍. അവരെയാണ് ഏതോ കുലംകുത്തിയെ കൊന്നെന്നും‍ പറഞ്ഞു പോലീസുകാര്‍ ഇങ്ങിനെ ഓടിച്ചിട്ടു പിടിക്കുന്നത്. പാര്‍ട്ടി നിഘണ്ടു അനുസരിച്ച് ഇസ്പേഡ് ഏഴാംകൂലി, കള്ളിയില്‍ കൊള്ളി വെക്കുന്നവന്‍ എന്നീ അര്‍ത്ഥങ്ങളിലെല്ലാമാണ് കുലംകുത്തി എന്നു പ്രയോഗിച്ചു വരുന്നത്. മാര്‍ക്സിസ്റ്റു പാര്‍ട്ടി ആളെക്കൊല്ലുന്ന പാര്‍ട്ടിയല്ല. കുലം കുത്തികളെ‍ ആള്‍ക്കാരുടെ കൂട്ടത്തില്‍ പെടുത്തില്ല. അതാണ്‌ പാര്‍ട്ടി സെക്രട്ടറി ആവര്‍ത്തിച്ചു പറഞ്ഞത്. കുലംകുത്തി കുലം കുത്തി തന്നെ! (മനുഷ്യനേ അല്ലെന്നു അരിയാഹാരമെല്ലാത്തതെല്ലാം ഭക്ഷിക്കുന്നവര്‍ക്ക് വായിക്കാം). ഇനി ഏതെങ്കിലും വിധത്തില്‍ കുലം കുത്തി മനുഷ്യനാണെന്നു തെളിയിച്ചാല്‍ തന്നെ കൊന്നത് പാര്ട്ടിയല്ല. സംസ്ഥാന നേതാക്കള്‍ തന്നെ അറസ്റ്റ് ചെയ്യപ്പെട്ടാല്‍ പോലും പാര്‍ട്ടിക്കതില്‍ യാതൊരു പങ്കുമില്ല. പ്രതികളല്ലാത്തവരെ പിടിക്കാന്‍ പരിശീലനം നല്കപ്പെട്ടവരാണ് നമ്മുടെ പൊലീസുകാരെന്നു ആര്‍ക്കാണറിഞ്ഞു കൂടാത്തത്. വേണമെങ്കില്‍ കോടിയേരിയോടു ചോദിച്ചു നോക്കാം. അദ്ദേഹമായിരുന്നല്ലോ പരിശീലിപ്പിച്ച ആശാന്‍. പാര്‍ട്ടി ചെയ്തതാവണമെങ്കില് അങ്ങു പ്രകാശ് കാരാട്ട് മുതല്‍ ഇങ്ങു സാദാ ലോക്കല്‍ കമ്മിറ്റി മെമ്പര്‍മാര്‍ വരെയുള്ളവര്‍ ദിനേശ് ബീഡിയുടെയും കട്ടന്‍ ചായയുടെയും ബലത്തില്‍ പകലന്തിയോളം ചര്‍ച്ച ചെയ്തു തീരുമാനിച്ചുറപ്പിച്ചതാവണം. അല്ലെങ്കിലും പാര്‍ട്ടി ഒരാളെ തട്ടുന്നുണ്ടെങ്കില്‍ നമ്പറിട്ടാണ് തട്ടുക. വണ്‍, ടൂ, ത്രീ, ഫോര്‍.. എന്നിങ്ങനെ. ടി. പി ചന്ദ്ര ശേഖരന് അങ്ങിനെ വല്ല നമ്പറും ഉണ്ടായിരുന്നതായി ഇതു വരെ പോലീസിനു കണ്ടെത്താന്‍ കഴിഞ്ഞിട്ടില്ല. പിന്നെ എന്ത് തെളിവാണ് പാര്‍ട്ടിക്കെതിരെ പോലീസിനു ഉന്നയിക്കാനുള്ളതെന്നാണ് മനസ്സിലാവാത്തത്.

Tuesday, 1 May 2012

ഉസ്താദേ, എന്താണാ വാക്കിന്റെ അര്ത്ഥം?

www.shamsiswanam.com/ഒരു പാട് കെട്ടുമാമാങ്കങ്ങളും ആഘോഷരാവുകളും കണ്ടു മതിമറന്ന കേരളത്തിന്റെ തലസ്ഥാന നഗരി കഴിഞ്ഞ ദിവസം മറ്റൊരു മാമാങ്കത്തിന് കൂടി സാക്ഷിയായി. ഒരു മത നേതാവ് നടത്തിയ കേരള യാത്രയുടെ ആര്‍ഭാട പൂര്‍ണമായ പരിസമാപ്തിയുടെ നിറങ്ങള്‍ പേജിലും സ്ക്രീനിലും മിന്നി മറഞ്ഞു കൊണ്ടേയിരുന്നു. പ്രൈം ടൈം ഷെഡ്യൂളുകള്‍ മാറ്റി വെച്ച് സ്പോണ്‍സേര്‍ഡ്  ലൈവ് ടെലികാസ്റ്റുകളുമായി ചാനല്‍ക്കൂട്ടങ്ങള്‍ സമ്മേളനത്തിന്റെ മദ്ഹ് പടപ്പാട്ടുകള്‍ പാടി വാങ്ങിയ കാശിനു ഉപകാരസ്മരണയോതി. കാസര്ക്കോട് നിന്നും ആദ്യമായല്ല ഒരാള്‍ തിരുവനന്തപുരത്തേക്കു യാത്ര തിരിക്കുന്നത്. രാഷ്ട്രീയത്തിന്റെ അരങ്ങേറ്റവും പിരിഞ്ഞൊഴിയലുമെല്ലാം പതിറ്റാണ്ടുകളായി കേരളം കണ്ടു വരുന്നത് ഇത്തരം യാത്രകളിലൂടെയാണ്. ആ യാത്രകളിലൊന്നും കാണാത്ത പളപളപ്പ്, അതിഭാവുകത്വങ്ങളെപ്പോലും അസ്ഥാനത്താക്കുന്ന ആഡംബരം..അതാണീ യാത്രയുടെ പ്രത്യേകതയും. ലക്ഷങ്ങള്‍ ചെലവഴിച്ച് കാസര്ക്കോട് നിന്നും തിരുവനന്തപുരത്തേക്ക് രണ്ടു ട്രെയിന്‍ സര്‍വീസുകള്‍, കോടികള്‍ മുടക്കി ഗള്‍ഫില്‍ നിന്നും രണ്ടു ചാര്‍ട്ടെര്ഡ് ഫ്ലൈറ്റുകള്‍. പുരോഹിതപ്പണക്കൊഴുപ്പുകള്‍ക്ക് മുകളില്‍ പറക്കാന്‍ അഗ്നി-5 മിസൈലുകള്‍ക്ക് പോലും ശേഷിയുണ്ടോ എന്നു തോന്നിപ്പിച്ച കെട്ടുകാഴ്ചകള്‍. എല്ലാ അര്‍ത്ഥത്തിലും ആര്‍ഭാടത്തിന്റെ അങ്ങേത്തലയോളം ചെന്നെത്തുന്ന അഭ്യാസങ്ങള്‍. രാഷ്ട്രീയപ്പാര്‍ട്ടികള്‍ക്ക് ഇത്തരം ആഡംബരങ്ങള്‍ ആഗ്രഹിച്ചാലും അവ പ്രദര്‍ശിപ്പിക്കാന്‍ അനുമതിയുണ്ടാവില്ല. പണത്തിന്റെ ഉറവിടങ്ങള്‍ തേടിയുള്ള ചോദ്യങ്ങള്‍ പാര്‍ട്ടിയെ വേട്ടയാടിക്കൊണ്ടിരിക്കും എന്നത് തന്നെ കാരണം. പക്ഷെ കോടികളുടെ കൊട്ടിയാടലുകള്‍ക്ക് കഴിഞ്ഞ ദിവസം തലസ്ഥാന നഗരി സാക്ഷിയായിട്ടും ആരും ഒരു ചോദ്യം പോലും ചോദിച്ചില്ല, ധനാഗമന മാര്‍ഗങ്ങളെപ്പറ്റി അന്വേഷിച്ചതുമില്ല; ഇനിയൊട്ടു അന്വേഷിക്കുകയുമില്ല. കാരണം ഇത് മതത്തിന്റെ പേരിലാണ്. തൊട്ടാല്‍ തൊട്ടവന് പൊള്ളും.

Sunday, 8 April 2012

പാര്‍ട്ടി മാനെജ്മെന്റ് കമ്പനിയും ഞമ്മള്‍ടെ കമ്മീഷനുകളും

 

ലോകം വിഡ്ഢിദിനം ആചരിക്കുന്ന ഏപ്രില്‍ മാസത്തില്‍ തന്നെ സി. പി. എമ്മിന്റെ പാര്‍ട്ടി കോണ്ഗ്രസ് സംഘടിപ്പിച്ചത് യാദൃശ്ചികമാവാന്‍ തരമില്ല. സാധാരണ ഗതിയില്‍ ഒരു പാര്‍ട്ടി കോണ്ഗ്രസ്സിന്റെ ഇഫക്റ്റ് മൂന്നു വര്ഷം വരെ നീണ്ടു നില്‍ക്കുന്നതാണ്. അത് കഴിഞ്ഞാല്‍ പിന്നെയും റീ ചാര്‍ജ് ചെയ്തു ഇഫക്റ്റ് നിലനിറുത്തുന്ന രീതിയാണ് സി. പി. എമ്മുകാര്‍ പൊതുവേ ഉപയോഗിച്ച് വരാറുള്ളത്. പത്തൊന്‍പതാം പാര്‍ട്ടി കൊണ്ഗ്രസ്സില്‍ കോയമ്പത്തൂരില്‍ വെച്ച് പറഞ്ഞ കാര്യങ്ങള്‍ തന്നെയാണ് കോഴിക്കോടും പാര്‍ട്ടിക്കു പൊടി തട്ടി വായിക്കാനുള്ളത്. മൊത്തത്തില്‍ ഒരു പാര്‍ട്ടി കോണ്ഗ്രസ് നടത്താന്‍ ആകെ വേണ്ടി വരുന്നത് നല്ലൊരു ഫോട്ടോസ്റ്റാറ്റ് മെഷീനും തിയ്യതി തിരുത്തിയെഴുതാന്‍ വേണ്ട പേനയും മാത്രമാണ്. അതിനീ ഇവന്റ് മാനെജ്മെന്റ് കമ്പനികളെ ഏല്‍പ്പിച്ചത് എന്തിനാണെന്ന് മാത്രം മനസ്സിലായിട്ടില്ല.

Sunday, 29 January 2012

ബീരാന്റെ ഭരണവും ജയരാജന്റെ സുവിശേഷവും

പഴയൊരു കഥയുണ്ട്. ബീരാന്‍ എന്ന നാട്ടിന്‍പുറത്തുകാരന്റെ കഥ. നിര്‍ത്തിയിട്ട ബസ്സില്‍ നിന്നിറങ്ങി ചായ കുടിച്ചുകൊണ്ടിരുന്ന ബീരാനോട്‌ അടുത്തിരുന്ന ആള്‍ പറഞ്ഞത്രേ: അതാ ബസ്സ്‌ പോകുന്നു. ഉടനെ ബീരാന്‍: അതെങ്ങനാ ബസ്സ്‌ പോയ്ക്കളയാ? ? ടിക്കറ്റ്‌ എന്റെ കയ്യിലല്ലേ?

കഥയിലെ ബീരാന്റെ സ്ഥിതിയാണിന്ന് മുസ്ലിം ലീഗിന്. പാര്‍ട്ടി ഭരണത്തിലുണ്ടാകുമ്പോള് മുസ്ലീങ്ങള്‍ പീഡിപ്പിക്കപ്പെടുകയില്ല എന്ന ലീഗിന്‍റെ പ്രസ്താവന കേട്ടപ്പോള്‍ ബീരാന്റെ കയ്യിലെ ടിക്കറ്റാണോര്മ വന്നത്. ഇ-മെയില്‍ ചോര്‍ത്തലൊന്നും പാര്‍ട്ടിയെ സംബന്ധിച്ചിടത്തോളം

Monday, 9 January 2012

ന്റെ ലൌവ്വേ..നമുക്കൊന്ന് ജിഹാദിച്ചു കളയാം..!

നാടു തോറും കച്ചേരികള്‍ കയറിയിറങ്ങി രജിസ്ട്രാര്‍ ബുക്കുകളുടെ നീളവും വീതിയുമളന്നു എക്സല്‍ ഷീറ്റില്‍ കോളം വരച്ചു അക്കങ്ങള്‍ എഴുതലായിരുന്നു ഒരു കാലത്ത് ചില പത്രക്കാരുടെ പ്രധാന പ്രവര്‍ത്തനം. ലവ് ജിഹാദ് എന്ന് പേരിട്ട എക്സല്‍ ഫയലിന്റെ ഷീറ്റുകള്‍ കൂടിയതല്ലാതെ ആനയുമില്ല..അത് കിടന്നിടത്ത് പൂടയുമില്ല എന്ന അവസ്ഥയിലെത്തിയപ്പോഴാണ് ആ പത്ര പ്രവര്‍ത്തനം തല്‍ക്കാലം നിര്‍ത്തിയത്. പൈങ്കിളി നോവലുകള്‍ എഴുതി മാത്രം ശീലിച്ച ചില പത്രക്കാരുണ്ട്. കര്‍ക്കിടക വാവിന് ആനയ്ക്ക് മദപ്പാട് വരുന്നത് പോലെ കൊല്ലാകൊല്ലം സ്ത്രീ സംബന്ധമായ വാര്‍ത്തകള്‍ പടച്ചു വിട്ട് സുഖം കണ്ടെത്തുന്ന ചില ഞരമ്പ്‌ രോഗികള്‍.

Sunday, 25 December 2011

ദൈവത്തിന്റെ ഹമീദിയന്‍ മാതൃകകള്‍

ദൈവസങ്കല്‍പം ദൈവ വിശ്വാസികളേക്കാളേറെ കൊണ്ട് നടക്കാറുള്ളത് ദൈവമില്ലെന്നു പറഞ്ഞു നടക്കുന്നവരാണ്. ദൈവം എങ്ങിനെയാകണം എങ്ങിനെയായിക്കൂടാ എന്നതിനെക്കുറിച്ച് കൃത്യമായ വിവരണങ്ങള്‍ ദൈവം തന്നെയില്ലെന്നു പറയുന്നവന്റെ പക്കലുണ്ടാകും. അതിന്റെ യുക്തി എന്താണെന്ന് യുക്തിവാദിയല്ലാത്തത് കൊണ്ടാകാം എനിക്കു മനസ്സിലാകാത്തത്. ‘ഒടുവില്‍ മുല്ലപ്പെരിയാറില്‍ ദൈവവും’ എന്ന തലക്കെട്ടില്‍ പുതിയ ലക്കം മലയാളം വാരികയില്‍ ഹമീദ് ചേന്നമംഗല്ലൂര്‍

Wednesday, 7 December 2011

പുന്നോലിന്റെ പുഴുക്കുത്തുകള്‍


"കൂട്ടുകാരാ, ഭീരുത്തം മൂലം ഒരിക്കലും ഒരു പട്ടിയും കുരയ്ക്കാതിരിക്കില്ല
സുഹൃത്തേ, പറയേണ്ടത് പറയാതെ, ഒരു പട്ടി പോലും
ആകാതെ, വാല് പോലും ഇല്ലാതെ നമ്മള്‍  ഈ സൌധങ്ങളില്‍ ചീഞ്ഞു നാറുന്നു....
(ശ്രീ ശങ്കര പിള്ളയുടെ ‘കഷണ്ടി’ എന്ന കവിതയില്‍ നിന്ന്)

Friday, 2 December 2011

ഐക്യത്തിന്റെ ആത്മാവ്

എണ്ണപ്പൊന്നിന്റെ സാന്നിധ്യം മരുഭൂമിയുടെ മണല്‍ത്തരികള്‍ അറിഞ്ഞു തുടങ്ങിയ അറുപതിന്റെ ഒടുക്കം. ബര്‍മക്കും സിലോണിനും പകരം ഗള്‍ഫ്‌ എന്ന പദം ഉപയോഗിച്ചു തുടങ്ങിയ കാലം. അതൊരു പുതിയ തുടക്കമായിരുന്നു. അതിനും മുമ്പ്‌ പരിശുദ്ധ ഗേഹം തേടിയുള്ള യാത്രയായിരുന്നു മറുനാടന്‍റെ ഗള്‍ഫ്‌ ഓര്‍മകളില്‍.. പോയവരില്‍ പലരും തിരികെ വരാറുണ്ടായിരുന്നില്ല. അവസാന യാത്രക്കുള്ള ഒരുക്കങ്ങളുമായാണവന്‍ വീട് വിട്ടിറങ്ങിയിരുന്നത്. പാതി വഴിയിലോ തിരികെ വീടണയാനുള്ള മടക്കത്തിലോ കൊഴിഞ്ഞു തീര്‍ന്നിരുന്ന യാത്രകള്‍. എന്നിട്ടും യാത്രകള്‍ അവസാനിച്ചില്ല. കാലം പത്തേമാരികളില്‍ മറുകര കാണിച്ചു തന്നപ്പോള്‍ കൂടുതല്‍ ചക്രവാളങ്ങള്‍ കീഴടക്കാനുള്ള വെമ്പലായിരുന്നു. മാസങ്ങള്‍ നീളുന്ന യാത്രക്കൊടുവില്‍ തീരത്തു നിന്നും കുറെയകലെ അവസാനിക്കുന്ന ഉരുവിലെ സഞ്ചാരം. ഖോര്ഫുക്കാന്‍ കടല്‍ തീരത്ത് ജീവിതം നീന്തിയടുപ്പിച്ച ആയിരങ്ങള്‍..ഒരു പക്ഷെ ആ നീന്തലിനിടയില്‍ കര കാണാന്‍ ഭാഗ്യം കിട്ടാതെ പോയ പതിനായിരങ്ങള്‍ വേറെയും. പ്രവാസത്തിന്റെ ചരിത്രം അവിടെ ആരംഭിക്കുകയായിരുന്നു. ഒപ്പം മാസ്മര വര്‍ണത്തിന്റെ മായാ പ്രപഞ്ചം തീര്‍ത്ത യു. എ. ഇ  എന്ന രാജ്യത്തിന്റെയും.
അതിനും മുമ്പ്‌ ഇന്നത്തെ യു. എ. ഇ ഉള്‍ക്കൊള്ളുന്ന പ്രദേശം ചെറു രാജ്യങ്ങളുടെ ഒരു കൂട്ടമായിരുന്നു. ഗോത്ര വഴക്കിലും താന്‍ പോരിമയിലും അകപ്പെട്ട് കഴിഞ്ഞിരുന്ന കുറച്ച് ഭരണാധികാരികളും അരപ്പട്ടിണിയുടെ സമൃദ്ധിയില്‍ ജീവിതത്തോട് മല്ലടിച്ചിരുന്ന ഒരു ജനതയും. ചരിത്രത്തിലുടനീളം അറബ് ജനതയുടെ ജീവിതം എന്നും പ്രതിസന്ധികളോടുള്ള സമരമായിരുന്നു. ജീവിതത്തിന്റെ തന്നെ പ്രതിസന്ധികളും ഒപ്പം സാഹചര്യങ്ങള്‍ തീര്‍ക്കുന്ന വൈതരണികളും. ജനിച്ച നാള്‍ തൊട്ട് ജീവിതത്തോട് മല്ലിടുന്ന പോരാട്ട വീര്യം. മരുഭൂമിയുടെ ചുഴികളും മണല്ക്കാറ്റും വകഞ്ഞു മാറ്റി അവര്‍ സഞ്ചരിച്ചത് ജീവിതത്തിലേക്കായിരുന്നു. ആ നൂറ്റാണ്ടുകളുടെ സഹനത്തിന് സ്രഷ്ടാവിന്റെ പാരിതോഷികമാവാം ഇന്നിന്റെ സമൃദ്ധി.
മരുഭൂമിയിലെ എണ്ണ കിനിയുന്ന കിണറുകള്‍ പോലെ അവരുടെ ഉള്ളിലെ വൈരത്തിന്റെ മഞ്ഞുരുകുന്ന കാഴ്ചയാണ് ലോകം പിന്നീട് കണ്ടത്‌. യു. എ. ഇ എന്ന രാജ്യപ്പിറവിയിലേക്ക് മനസ്സുകളെ കൊണ്ടെത്തിച്ച ഒരു ദീര്ഗ ദര്ശിയുണ്ടായിരുന്നു. എല്ലാ അര്‍ത്ഥത്തിലും സമ്പൂര്‍ണനായ ഒരു രാജ്യ നായകന്‍. ശൈഖ് സായിദ്‌ എന്ന യു. എ. ഇ യുടെ രാഷ്ട്ര പിതാവ്. നന്മയുടെയും സൌഹാര്ദത്തിന്റെയും ഉന്നത മൂല്യങ്ങള്‍ കൊണ്ട് വിളക്കിച്ചേര്ത്തും സ്നേഹത്തിന്റെ പരിമളം കൊണ്ട് സമ്പുഷ്ടമാക്കിയും എങ്ങിനെ ഒരു രാഷ്ട്രം കെട്ടിപ്പടുക്കാം എന്ന് പഠിപ്പിച്ചു തന്ന ജന നേതാവ്‌. അതായിരുന്നു ശൈഖ് സായിദ്‌. വഴികളും ആശയങ്ങളും നല്‍കി വീട്ടിലിരിക്കുന്ന നേതാവായിരുന്നില്ല അദ്ദേഹം, പകരം എന്നും വഴികാട്ടിയായി മുമ്പില്‍ നടന്നു. ഒപ്പം ഇച്ഛാശക്തിയുള്ള ഒരു സമൂഹത്തെ വാര്‍ത്തെടുക്കാനും അദ്ദേഹം മറന്നില്ല. ഇന്നീ രാജ്യത്തിന്റെ സാരഥിയായ ശൈഖ് ഖലീഫയുടെയും വഴിത്താരകള്‍ പിതാവിന്റെതു തന്നെയെന്ന് കാണുമ്പോള്‍ സന്തോഷം വരുന്നത് പ്രവാസിയുടെ കണ്ണുകളിലാണ്. കാരണം സ്നേഹവും ആതിഥ്യവും നല്‍കി ശൈഖ് സായിദ്‌  സ്വന്തം ജനതയെപ്പോലെ ഒരു പക്ഷെ അവരേക്കാളേറെ പരിഗണിച്ചത്‌ പ്രവാസി സമൂഹത്തെയായിരുന്നു; വിശേഷിച്ചും ഇന്ത്യാക്കാരെ. ഇന്ത്യാക്കാരനും ആ സ്നേഹം തിരിച്ചു നല്‍കിയ ചാരിതാര്‍ത്ഥ്യം.!   
കടലില്‍ നിന്നും മുത്തും മത്സ്യവും ശേഖരിച്ചു വിപണനം നടത്തിയ ദുബായിയുടെ ഇന്നലെകളില്‍ നിന്നും സ്കൈ സ്ക്രാപറുകളുടെയും ഹൈപര്‍ ടെക്നോളജിയുടെയും ഇന്നിലേക്കുള്ള ദൂരം കണ്ണിമ വെട്ടുന്ന വേഗത്തിലായിരുന്നു. ഏഴ് എമിറേറ്റുകളില്‍ തലസ്ഥാനമായ അബുദാബി എണ്ണയില്‍ സമൃദ്ധി കണ്ടപ്പോള്‍ പേരിനു മാത്രം എണ്ണ സമ്പത്തുള്ള ദുബായ് വേറിട്ട വഴിയിലൂടെ സഞ്ചരിക്കുകയായിരുന്നു. ലോകം ഒരു കുടക്കീഴില്‍ എന്നും ആഗോള ഗ്രാമം എന്നും ലോകം പിന്നീട് പേരിട്ടു വിളിച്ചതിനെ യാഥാര്‍ത്ഥ്യമാക്കി കാണിച്ചു കൊടുത്തു കൊണ്ടായിരുന്നു ദുബായിയുടെ കുതിപ്പ്. മരുക്കടലില്‍ നിന്നും സ്വപ്നഭൂമിയിലേക്കുള്ള പരിവര്‍ത്തനം. ഇന്ന് ദുബായിക്കാരന് മരുഭൂമി കാണണമെങ്കില്‍ ഏറെ ദൂരം യാത്ര ചെയ്യണം. ദുബായിയുടെ വളര്‍ച്ച മനുഷ്യന് ദൈവം നല്‍കിയ കഴിവിന്‍റെ അനന്യ സാധ്യതകള്‍ തേടിയുള്ള യാത്രകള്‍ കൂടിയായിരുന്നു. ധിഷണയും കഠിന പ്രയത്നവും കൂടിച്ചേര്‍ന്നപ്പോഴുണ്ടായ അത്ഭുതം..അതാണിന്നത്തെ ദുബായ് നഗരത്തിന്റെ ചൈതന്യം. ഗള്‍ഫ്‌ നാടുകള്‍ക്ക് നമ്മള്‍ മലയാളികള്‍ പൊതുവേ പറഞ്ഞു ശീലിച്ച പേരാണ് ദുബായ്. ദുബായിക്കാരനെന്ന വിളിപ്പേര് സൌദിക്കാരന്‍ കൂടി ആസ്വദിക്കുന്ന അവസ്ഥകളിലേക്കുള്ള അസൂയപ്പെടുത്തുന്ന വളര്‍ച്ച,  പാശ്ചാത്യ നാടുകള്‍ നൂറ്റാണ്ടുകള്‍ കൊണ്ട് നേടിയെടുത്തത്‌ ദുബായ് ഏതാനും മാസങ്ങള്‍ കൊണ്ട് യാഥാര്‍ത്ഥ്യമാക്കിയെന്നതാണ് അതിനെ വ്യതിരിക്തമാക്കുന്നത്. ഇന്ന് മറ്റ് ഗള്‍ഫ്‌ നാടുകള്‍ക്ക് വികസന കാര്യങ്ങള്‍ക്കുള്ള ‘റോള്‍ മോഡല്‍’ ദുബായ് ആണെന്നത് വാസ്തവം. ഇതിനൊക്കെയും സാരഥ്യം വഹിച്ച മഖ്തൂം കുടുംബം. പ്രത്യേകിച്ച് ശൈഖ് മുഹമ്മദ്‌ എന്ന ജനകീയ നേതാവിന്റെ വീക്ഷണവും വിചാരങ്ങളും. സമാനതകളില്ല ഇത് പോലൊരു ജനകീയ ഭരണാധികാരിക്ക്. തന്റെ ഒന്നാം നമ്പര്‍ വാഹനത്തില്‍ പരിവാരങ്ങളില്ലാതെ അകമ്പടി വാഹനങ്ങളില്ലാതെ നിങ്ങള്ക്ക് കാണാം ഈ നാടിന്റെ നായകനെ. ദുബായിയുടെ പാതയോരങ്ങളില്‍. ഇഴഞ്ഞു നീങ്ങുന്ന ട്രാഫിക്കിനിടയില്‍ അതുമല്ലെങ്കില്‍ മെട്രോ ട്രെയിനിന്റെ സാദാ കമ്പാര്‍ട്ടുമെന്റില്‍ അദ്ദേഹം കയറി വന്നേക്കാം..നിങ്ങളിലൊരുവനായി..ഭരണാധികാരി എന്ന പരുക്കന്‍ ജാഡകളില്ലാതെ..!  
ഗള്‍ഫ്‌ എന്ന നാട്ടിലേക്കുള്ള പ്രയാണം ഇന്ത്യയുടെ തന്നെ ചരിത്രത്തിന്റെ ഭാഗമാണ്. വിശേഷിച്ചും കേരളത്തിന്റെ. ഇന്ന് കേരളത്തില്‍ സമൃദ്ധിയായ് കാണുന്നതെല്ലാം ഗള്‍ഫുകാരന്റെ വിയര്‍പ്പിന്റെ ശേഷിപ്പുകളാണ്. പത്തേമാരിയില്‍ തുടങ്ങിയ ജീവിതയാത്രയുടെ ശേഷിപ്പുകള്‍..! ആ ശേഷിപ്പുകളിലാണിന്നും കേരളം ഉണ്ണുന്നതും ഉടുക്കുന്നതും ഉറങ്ങുന്നതും. അതിന്റെ പകുതിയും യു. എ. ഇ യുടെ സ്നേഹ സംഭാവനകളും. തീ പുകയാത്ത കൂരയുടെ സ്ഥാനത്ത്‌ മണിമാളികകള്‍ പൊങ്ങിയതും ഹവായ് ചപ്പലും ഹെര്‍കുലീസ് സൈക്കിളും സ്വപ്നം കണ്ടിരുന്നവര്‍ വേര്സാച്ചി മണമുള്ള കുപ്പായങ്ങളിട്ടു റോള്‍സ് റോയ്സില്‍ ചാഞ്ഞിരിക്കുന്നതും ഈ നാടിന്റെ അതിലുപരി ഇവിടത്തുകാരുടെ സാഹോദര്യ സ്നേഹത്തിന്റെ, കരുണാ വായ്പുകളുടെ ഈന്തപ്പഴ മധുരം ഒന്ന് കൊണ്ട് മാത്രമാണ്. ഇസ്ലാമിക ചരിത്രത്തിലെ അന്‍സാറുകളെ പോലെ.. പരസ്പരം പകുത്തു നല്‍കുകയായിരുന്നു..ജീവനും ജീവിതവും! ഇന്ത്യാ സന്ദര്‍ശനത്തിനിടയില്‍ ഒരിക്കല്‍ ശൈഖ് മുഹമ്മദ്‌ പറഞ്ഞത്‌ പോലെ ഇന്ത്യയിലേക്ക് വരുമ്പോള്‍ എനിക്ക് ഒരു അന്യതാ ബോധം ഉണ്ടാകുന്നില്ല. എന്‍റെ സ്വന്തം നാട്ടിലേക്ക് വരുന്ന പ്രതീതി. എന്നാല്‍ കേരളത്തിലേക്ക് പോയാല്‍ സ്വന്തം വീട്ടിലെത്തിയത് പോലെയാണ്. അദ്ദേഹത്തെ കൊണ്ട് ഇത് പറയിപ്പിച്ച ആ പരസ്പര സ്നേഹ-സഹോദര ബന്ധം നില നിര്‍ത്താം നമുക്ക്‌.. കാലങ്ങളോളം..നമ്മുടെ വറ്റിന്റെ മണികള്‍ വിതറിയിരിക്കുന്ന ഈ മണ്ണിനും ഇവിടുത്തെ ജനങ്ങള്‍ക്കും സകല സമൃദ്ധികളും സര്‍വേശ്വരന്‍ ഇനിയും കനിഞ്ഞരുളട്ടെ.. ഈ നാടിന്റെ നമ്മുടെ ഈ രണ്ടാം വീടിന്റെ വാര്‍ഷികത്തില്‍ എല്ലാ ആശംസകളും നേരുന്നു. ഈ ഒരുമയുടെ വിളക്കണയാതെ അതിന്റെ ആത്മാവിനെ ദൈവം എന്നെന്നും ജ്വലിപ്പിച്ചു നിര്‍ത്തട്ടെ.!

Saturday, 22 October 2011

പടച്ചോന്റെ ഭൂമിയില്‍ വെല്‍ഫെയര്‍ ഭരണം


വേണ്ടതൊന്നും നാം വേണ്ട പോലെ കാണാറില്ല. പെരുത്ത് ആളുകളുള്ള ജമാഅത്തെ ഇസ്ലാമി എന്ന സംഘടനയുടെ അതിലും പെരുത്ത് അംഗങ്ങളുള്ള 'വെല്‍ഫെയര്‍ പാര്‍ട്ടിയുടെ' സംസ്ഥാന പ്രഖ്യാപനം കഴിഞ്ഞ ദിവസം  കോഴിക്കോട് വെച്ച് നടന്നതൊന്നും നമ്മുടെ പത്രക്കാര്‍ക്കും ചാനലുകാര്‍ക്കുമൊന്നും വലിയ വാര്‍ത്തയല്ല പോലും. അവരെ കുറ്റം പറഞ്ഞിട്ടും കാര്യമില്ല. ആ പഹയന്മാരും ഇപ്പോ 'മൂല്യം' നോക്കാന്‍ തുടങ്ങിയിരിക്കുന്നു. ശുംഭന്‍ ഫെയിം ജയരാജന്‍ സഖാവ് പിള്ളപ്പോലീസിനെതിരെ ജിഹാദ് പ്രഖ്യാപനം (കണ്ടേടത്ത് വെച്ച് തല്ലുക!) നടത്തിയതാണ് എല്ലാവര്ക്കും വെണ്ടയ്ക്ക. ഖല്‍ബിന്റെ ഉള്ളിലും തൊലിപ്പുറത്തും 'മൂല്യം' ആവോളമുള്ള സംഘടനയുടെ പാര്‍ട്ടി പ്രഖ്യാപനത്തിന് ഒരു മൂല്യവുമില്ലെന്നു വരുന്നത് നിലവിലുള്ള വ്യവസ്ഥിതിയുടെ തകരാറല്ലാതെ മറ്റെന്താണ്? ഈ വ്യവസ്ഥിതി മാറ്റത്തിനാണ് പുലയനെയും പള്ളീലച്ചനെയുമൊക്കെ കൂട്ടിച്ചേര്‍ത്തു വെച്ച് പാര്‍ട്ടി തട്ടിക്കൂട്ടിയത്‌.

പടച്ചോന്റെ ഭൂമിയില്‍ പടച്ചോന്റെ ഭരണം എന്നാണ് സായിപ്പിനോടേറ്റു മുട്ടുന്ന കാലം മുതല്‍ ‘സാഹിബ്’ പഠിപ്പിച്ചതും കുട്ടികള്‍ കേട്ടതും. അത് കൊണ്ട് തന്നെ സായിപ്പാകുന്ന വിഗ്രഹത്തെ എടുത്തു മാറ്റി ജനാധിപത്യമാകുന്ന മറ്റൊരു വിഗ്രഹത്തെ സ്ഥാപിക്കുന്ന മെനക്കേട് പണിക്കൊന്നും അവറ്റകളെ കിട്ടിയതുമില്ല. ഫലത്തില്‍ ഗാന്ധിജിയും കൂട്ടരും പോസ്റ്റര്‍ ഒട്ടിക്കാന്‍ ആളില്ലാതെ നന്നേ കഷ്ടപ്പെട്ടു. ആകെക്കൂടി ഇവരെക്കൊണ്ട് നേരാം വണ്ണം ചെയ്യാനറിയുന്നത് അതു മാത്രമാണല്ലോ? നാലാളേ  ഉള്ളൂവെങ്കിലും നാല്പത് പോസ്റ്റര്‍ ഒട്ടിച്ചു നാട്ടുകാരെ അറിയിക്കാനുള്ള മിടുക്ക് സുന്നികളും മുജാഹിദുകളും എന്തിനു സി. പി. എമ്മുകാര്‍ പോലും കണ്ടു പഠിക്കണം. അതെന്താണെപ്പാ നിങ്ങളിങ്ങനെ വകതിരിവില്ലാതെ സംസാരിക്കുന്നത്? പ്ലാച്ചിമടയും പരിസ്ഥിതിയും എന്‍ഡോസള്‍ഫാനുമൊന്നും സംഘടന ഏറ്റെടുത്ത്‌ വിജയിപ്പിച്ചത് നിങ്ങള്‍ അറിഞ്ഞില്ലാന്നാണോ? പണ്ട് എന്‍ഡോസള്‍ഫാനെക്കാളും വലിയ ദുരിതങ്ങള്‍ ഈ നാട്ടുകാര്‍ക്ക് വിതച്ച് ഇവിടുത്തെ മണ്ണടക്കം വെളുത്ത കള്ളന്മാര്‍ കട്ടു കൊണ്ട് പോകുന്നത് കൈലിയും മടക്കിക്കുത്തി കക്ഷത്തില്‍ ഖുതുബാത്തും തിരുകി നോക്കി നിന്നവരുടെ പേരക്കുട്ടികളാണിന്ന് ഇമ്മിണി ബല്യ ബാനറുമായി ഇക്കണ്ട സമരത്തിനൊക്കെ ഇറങ്ങിത്തിരിച്ചത് എന്ന് കാണുമ്പോള്‍ സത്യം പറയാലോ കോരിത്തരിച്ചു പോയി. (വായിച്ചിട്ട് നിങ്ങളും കോരിത്തരിക്കുന്നുണ്ടാകും)

എനിക്കിനിയും മനസ്സിലാകാത്ത ഒരു കാര്യം എന്തിനാണീ പാര്‍ട്ടി നിലവില്‍ വന്നത് എന്നാണ്? (എന്റെ വിവരക്കേട് കൊണ്ടായിരിക്കും ഇത്തരം കൊനിശ്ടു ചോദ്യങ്ങള്‍ ചോദിക്കുന്നത്). പല പല പേരുകളില്‍ കൊടികളില്‍ ഒരു പാട് പാര്‍ട്ടികള്‍ ഇവിടെയുള്ളപ്പോള്‍ ഇലാഹീ രാഷ്ട്രീയക്കാര്‍ക്ക് ‘ഈ വീട്ടിലെന്തു’ കാര്യം?  ‘മാറ്റത്തിനൊരു വോട്ട്’ എന്നും പറഞ്ഞു ജനങ്ങള്‍ക്കിടയിലേക്കിറങ്ങിയപ്പോള്‍ ജനങ്ങളവരെ മാറ്റി വെച്ച് വോട്ട് ചെയ്തതാണ് നമ്മള്‍ കണ്ടത്‌. അങ്ങനെ കണ്ടറിഞ്ഞ കൂട്ടരാണിപ്പോ പാര്‍ട്ടി പ്രഖ്യാപനവുമായി ഇറങ്ങിത്തിരിച്ചിരിക്കുന്നത് എന്ന് കാണുമ്പോ സഹതാപം കൊണ്ട് ജയരാജന്‍ സഖാവ് പറഞ്ഞത് പോലെ കണ്ടേടത്ത് വെച്ച് തല്ലാന്‍ തോന്നിപ്പോകുന്നു. കൊണ്ടേ പോകൂ എന്നു വന്നാല്‍..? ഏതായാലും വരാനുള്ളത് വെല്‍ഫെയര്‍ ആയി വരും എന്ന് കരുതി സമാധാനിക്കാം.

ഹിറാ സെന്ററിലെ മൂല്യ മാപിനീ യന്ത്രത്തിന്റെ ഹിക്മത്ത് ഖൌമിനും ഖൌമാല്ലാത്തവര്‍ക്കും (മനുഷ്യ ജന്തുക്കള്‍ക്കും മറ്റു ജന്തുക്കള്‍ക്കുമെന്നു സാരം) ഇന്നേ വരെ മനസ്സിലായിട്ടില്ല. കഴിഞ്ഞ പഞ്ചായത്ത്‌ തെരഞ്ഞെടുപ്പില്‍ ചില ബി ജെ പി സ്ഥാനാര്‍ഥികള്‍ക്ക് വരെ ആ യന്ത്രം മൂല്യം പ്രവചിച്ചു കളഞ്ഞു പോല്‍! ഈ നാട്ടിലെ ഭരണകൂടം ഇസ്ലാമികമായി മാറ്റാന്‍ കഴിയുമെന്ന് യന്ത്രത്തിനു തോന്നിയോ ആവോ? അങ്ങിനെയാണെങ്കില്‍ മാത്രമേ തെരഞ്ഞെടുപ്പില്‍ പങ്കെടുക്കൂ എന്ന് ‘വല്ലാഹി.. സുമ്മ വല്ലാഹി’ നാഴികയ്ക്ക് നാല്പതു വട്ടം ചൊല്ലി ഊശാന്‍ താടിയും തടവി നടന്നൊരു കാലമുണ്ടായിരുന്നു. തുപ്പലിറക്കിയാല്‍ നോമ്പ് മുറിയുമോ ഉസ്താദേ എന്ന് ചോദിച്ച കുട്ടിയോട് പോലും ഇസ്ലാമിന്റെ സമഗ്രതയും ഹുക്കൂമത്തെ ഇലാഹിയും ഉത്തരം കൊടുത്തിരുന്ന ഒരു പഴയ കാലം. കള്ളുകുടിയും പലിശയും പരസ്ത്രീ ഗമനവും വോട്ടു ചെയ്യലും ഒക്കെ ഹറാമായിരുന്നു അന്ന്. ഇന്നതില്‍ പലതും ഹരം ആണെന്ന വ്യത്യാസം മാത്രം. ഈ മാറ്റത്തിനാണ് (ഹറാമായിരുന്നതിനെ ഹരമാക്കിയ) വോട്ട് ചോദിച്ചത്. വോട്ടെണ്ണി വന്നപ്പോ എണ്ണം തീര്‍ന്നു അടക്ക ബാക്കി എന്ന് പറഞ്ഞത്‌ പോലെ കൂട്ടാനെടുത്തു വെച്ച വിരലുകള്‍ ബാക്കി. പോത്തിന്‍ കുട്ടിക്ക് കാടി വെള്ളം കൊടുത്തത്‌ പോലെയാണ് വോട്ടിന്റെ കാര്യത്തില്‍ ജമാഅത്ത്‌ നിലപാട്. ആദ്യം കാടി കൊടുത്തവനെ കുത്താന്‍ വരും. പിന്നെപ്പിന്നെ കാടി ഇഷ്ടമാകും. അവസാനം കൊടുത്തില്ലെങ്കില്‍ കുത്തും എന്ന സ്ഥിതിയാകും. തുടക്കവും ഒടുക്കവും കുത്ത് തന്നെയാണ് ജമാഅത്ത്‌ ജനങ്ങള്‍ക്ക്‌ കൊടുക്കുക എന്ന് സാരം.

ഭരണ സംസ്ഥാപനത്തിനായുള്ള യത്നത്തില്‍ ബറേല്‍വികളെയും ഖവാരിജുകളെയും ഒക്കെ കൂടെ കൂട്ടാമെന്ന് മൌദൂദി സാഹിബ് പറഞ്ഞിട്ടുണ്ടെങ്കിലും പുതിയ കാലത്തത് ബി. ജെ. പി. ക്കാരും പാതിരിയും പുലയനും അരയനുമൊക്കെ ആവാമെന്ന വ്യാഖ്യാനം സാഹിബ് പൊറുക്കുമെന്നു തന്നെ കരുതാം. എന്നിരുന്നാലും മതേതര ജനാധിപത്യത്തിനു വക്കാലത്തോതുന്ന പാര്‍ട്ടി സമ്പ്രദായത്തെ മൌദൂദി പൊറുത്താലും അദ്ദേഹത്തിന്റെ തൂലികയില്‍ നിന്നുതിര്‍ന്നു വീണ അനേകായിരം മഷിത്തുള്ളികള്‍ക്കത് പൊറുക്കാനാവില്ല. വോട്ട്‌ ചെയ്യാതെ മരണപ്പെട്ടു പോയ നൂറു കണക്കിനു ജമാഅത്ത്‌ സഹോദരങ്ങളെപ്പോലെ.. ഐ പി എച്ച് പുസ്തക ശാലയില്‍ പൊടി പിടിച്ചു കിടക്കുന്ന പുസ്തകങ്ങളിലെ അക്ഷരക്കൂട്ടങ്ങള്‍ ഉള്ളൂറി ചിരിക്കുന്നുണ്ടാവാം; തങ്ങളുള്ളില്‍ പേറുന്നതിന്റെ സമകാലിക ഭാഷ്യങ്ങളോര്‍ത്ത്. ജമാഅത്ത് സാഹിത്യങ്ങള്‍ വായിച്ചു വശം കെട്ട സാധാരണക്കാരന്‍ ചോദിച്ചു പോവുകയാണ്. വൈരുദ്ധ്യങ്ങളുടെ ഈ ‘വ്യവസ്ഥിതിക്ക്’ എന്ന് മാറ്റം വരും?

ലാസ്റ്റ്‌ ബോള്‍: ലീഗ് എ. പി സുന്നികളുമായി അടുക്കുന്നു.

“ചക്രവാളത്തോടടുക്കുന്തോറും കരയിലേക്കുള്ള ദൂരം കൂടി വരും.”
(ആര്‍ക്കു മനസ്സിലായില്ലെങ്കിലും ഇപ്പറഞ്ഞത് ജമാഅത്തുകാര്‍ക്ക് തിരിയും. തിരിയേണ്ടത് ഇ.കെ സുന്നികള്‍ക്കാണ്. അവര്‍ക്കത് മറ്റന്നാളെ തിരിയൂ. അപ്പോഴേക്കും പൂരവും കഴിഞ്ഞു ചന്തയും പറിച്ചു ആളുകള്‍  പോയിട്ടുണ്ടാകും.)

Saturday, 27 August 2011

അസ്സലാമു അലൈകും യാ..



റമദാന്‍ വിട വാങ്ങുകയാണ്.
നന്മകളുടെ പൂമരത്തില്‍ ഇനി ഏതാനും ഇലകള്‍ മാത്രം.
റമദാനിന്‍റെ വിട വാങ്ങല്‍ വിശ്വാസിക്ക് വേദനയാണ്.
വിങ്ങുന്ന ഹൃദയവും കണ്ണീരില്‍ കുതിര്‍ന്ന ഇരവുകളുമായ്
അവനതിനെ യാത്രയയക്കുന്നു.
ഇനിയൊരു റമദാനിനെക്കൂടി വരവേല്‍ക്കാന്‍ നമ്മിലെത്ര പേര്‍?
വിട പറച്ചിലുകള്‍ വേദനകളാണ് സമ്മാനിക്കുന്നത്.
മുന്‍വര്‍ഷങ്ങളിലെ റമദാനില്‍ നമ്മോടോപ്പമുണ്ടായിരുന്നവര്‍
ഇന്ന് ഹൃദയത്തിന്റെ ഓര്മച്ചിത്രങ്ങളില്‍
പൊടിപിടിച്ചു കിടക്കുന്നു.
റമദാനിന്‍റെ യാത്ര പറച്ചില്‍ എന്നെ ഓര്‍മപ്പെടുത്തുന്നത്
ക്ലാവു പിടിക്കാത്ത ഓര്‍മകളുടെ വസന്തങ്ങളാണ്.
പ്രിയപ്പെട്ട പിതാവിനെ കുറിച്ചുള്ള ഓര്‍മ്മകള്‍!
രണ്ടായിരാമാണ്ടിലെ റമദാനിന്‍റെ ഇത് പോലൊരു
ദിനത്തിലായിരുന്നു ഞങ്ങളുടെ ബാപ്പ നാഥന്റെ
വിളിക്ക് ഉത്തരമേകിയത്.
വേര്‍പാടിന്റെ നൊമ്പരം എന്തെന്നറിയിച്ച ദിനരാത്രങ്ങള്‍.
ഈ മടിയിലായിരുന്നു ബാപ്പയുടെ അന്ത്യ നിമിഷങ്ങള്‍.
അതിന്റെ ഞെട്ടല്‍ മാറാന്‍ ദിവസങ്ങള്‍ കുറെയെടുത്തു.
മരണത്തിനു മുമ്പില്‍ നമ്മളെല്ലാം നിസ്സഹായര്‍!
സ്രഷ്ടാവിന്റെ വിധിക്ക് മുമ്പില്‍ കീഴടങ്ങുകയല്ലാതെ
സൃഷ്ടികളായ മനുഷ്യര്‍ക്ക്‌ അതില്‍ എന്തധികാരം?
മടിയില്‍ തലവെച്ചു കിടക്കുന്ന ബാപ്പയുടെ
നെറ്റിത്തടത്തിലെ വിയര്‍പ്പു കണങ്ങള്‍ ഒപ്പിക്കൊടുക്കുന്നതിനിടയില്‍
ഞാനറിഞ്ഞു ആ ദൃഷ്ടികളുടെ ചലനം നിലയ്ക്കുന്നത്..
ശ്വാസോച്ച്വാസത്തിന്റെ തോത് മന്ദഗതിയിലാകുന്നത്..
അറിയില്ലായിരുന്നു ബാപ്പാന്റെ അവസാന
നിമിഷങ്ങളായിരുന്നു അതെന്ന്.
വിശ്വസിക്കാനാവുന്നുണ്ടായിരുന്നില്ല..പരിശോധിച്ച
ഡോക്ടര്‍മാരുടെ കാരണത്തെയും
മരണമെന്ന സത്യത്തെയും.
കാലമിത്ര കഴിഞ്ഞിട്ടും ഇന്നും ആ ഓര്‍മകള്‍ക്ക്
മങ്ങലേറ്റിട്ടില്ല.. നെഞ്ചോടു ചേര്‍ത്ത് വെക്കാന്‍ ഒരു പാട്
നല്ല ഓര്‍മ്മകള്‍ മാത്രം തന്നു യാത്രയായ ബാപ്പ
ഇന്നും ഞങ്ങള്‍ക്കിടയില്‍ ജീവിക്കുന്നുവെന്ന തോന്നല്‍..
അദ്ദേഹത്തിന്റെ സ്വതസിദ്ധമായ സംഭാഷണങ്ങളുടെ അനുഭവങ്ങളിലൂടെ..
പറഞ്ഞു വെച്ച തമാശകളിലൂടെ, പങ്കു വെച്ച ചിന്താ ശകലങ്ങളിലൂടെ,
അറിവുകള്‍ പകര്‍ന്നു തന്ന ജീവിതയാത്രകളിലൂടെ..
എല്ലാം ബാപ്പ ഇന്നും നിറഞ്ഞു നില്‍ക്കുന്നു. ആളുകളെ മനസ്സിലാക്കുന്നതില്‍ ഒരു പ്രത്യേക വൈദഗ്ദ്യം
തന്നെയുണ്ടായിരുന്നു അദ്ദേഹത്തിന്.
അനാഥത്വം പേറിയ ബാല്യവും പന്ത്രണ്ടാം വയസ്സില്‍ തുടങ്ങിയ
ജീവിതായോധന യാത്രയുടെ തീക്ഷ്ണാനുഭവങ്ങളും അദ്ദേഹത്തിന്
പകര്‍ന്നു നല്കിയതാവാം ഈ അറിവുകള്‍.
ഞങ്ങളോടൊപ്പം കളിക്കൂട്ടുകാരനായും
യാത്രകളില്‍ അധ്യാപകനായും വികൃതികളില്‍
കാര്‍ക്കശ്യക്കാരനായും ഞങ്ങളനുഭവിച്ച അദ്ദേഹത്തിന്റെ ഭാവങ്ങള്‍..
കടല്‍ക്കരയില്‍ രാവേറുവോളം ഞങ്ങള്‍ കുട്ടികളെയും കൊണ്ട്
കടംകഥ പറഞ്ഞിരുന്ന നാളുകള്‍ ഞങ്ങളുടെ കുടുംബത്തിലെ
എതോരാള്‍ക്കാണ് മറക്കാനാവുക?
ഒരു പുരുഷായുസ്സിന്റെ സ്നേഹവും വാലസല്യവും നല്‍കി
യാത്രയായ ആ പ്രിയ പിതാവിനെ കുറിക്കുന്നതെന്തും
ഇന്ന് കണ്ണുകളെ ഈറനണിയിക്കുന്നു.
നാട്ടിലായിരുന്നപ്പോള്‍ പള്ളിക്കാട്ടില്‍ അദ്ദേഹത്തിനരികില്‍
ചെന്നിരുന്നു കരഞ്ഞാല്‍ അല്പം സമാശ്വാസം കിട്ടാറുണ്ടായിരുന്നു.
പ്രവാസം അതിനും വയ്യാതാക്കിയിരിക്കുന്നു.
അസ്സലാമു അലൈകും യാ ദാറ ഖൌമിന്‍..എന്ന് തുടങ്ങുന്ന
പ്രാര്‍ത്ഥന പഠിപ്പിച്ചു പ്രവാചകന്‍, ഖബറിടത്തിലേക്ക് 
ചെല്ലുമ്പോള്‍ ഉരുവിടാന്‍..
'വിശ്വാസത്തിന്റെ ഭവനങ്ങളിലുള്ളവരേ, നിങ്ങള്ക്ക് സമാധാനം!
ദൈവാധീനത്താല്‍ ഞങ്ങളും നിങ്ങളോടൊപ്പം ഉടന്‍ വന്നു ചേരുന്നതാണ്, തീര്‍ച്ച!'
ജീവിതത്തിന്റെ നൈമിഷികതയെ കുറിക്കുന്ന സുന്ദരമായ അഭിവാദ്യം!
ഒരു ദിനം മൂന്നു തുണ്ടം തുണിയില്‍ പൊതിഞ്ഞു നമ്മളും
ആ ഖബറിടത്തില്‍ എത്തിച്ചേരും..സന്ദര്‍ശകനായല്ല, അന്തേവാസിയായി..
നമ്മുടെ ഖബറിങ്കല്‍ വന്നിരുന്നു സ്രഷ്ടാവിനോട്‌ കരയാന്‍
നമ്മുടെ മക്കള്‍ക്ക്‌ സമയം ഉണ്ടാകുമോ?
പ്രവാസത്തിന്റെ, തിരക്കിന്റെ, ഓര്‍മ്മക്കുറവിന്റെ ന്യായീകരണങ്ങളാകുമോ അവര്‍ക്ക് പറയാനുണ്ടാവുക?
കാലം ബാക്കി വെച്ചത് നല്ലതായിരിക്കട്ടെ!
ഈ ഓര്‍മ്മക്കുറിപ്പുകള്‍‍ക്കൊടുവില്‍ ബാക്കിയാവുന്നത്
പരിവേദനങ്ങളാണ്.. ഹൃദയത്തിന്റെ അന്തരാളങ്ങളില്‍ നിന്നുള്ള പ്രാര്‍ത്ഥനകളാണ്..
നാഥാ! നിന്റെയടുക്കലെത്തിക്കഴിഞ്ഞ ഞങ്ങളുടെ പ്രിയപ്പെട്ട ബാപ്പയ്ക്ക് നീ പൊറുത്തു കൊടുക്കേണമേ.. സ്വര്‍ഗത്തില്‍ ഞങ്ങളെ ഒരുമിച്ചു കൂട്ടേണമേ..!